震 ~ 震 ~ 震 ~

真係諗唔到，尋日竟然係地震. 個時我係 Lamma 大街日本舖食緊野。無 la la 好似有石頭跌落地o甘，震了一下，之後就有一下長震，維持o左幾秒。我開頭仲以為有人裝修，或者係發電廠爆炸！你知la，Lamma 又無車，鬼死甘靜，應該係發電廠爆炸 :P

點之幾分鐘之後收到鄰居阿 Mike 電話，問我覺唔覺頭先得震？個時先知原來唔係自己寫 programm 寫得幻覺。一路上山，不停打俾朋友。結果係住港島既朋友感受到，住新界區既朋友就難o的。

天文台話地震央o係擔杆島海域，強度為黎克特制3.5級. 而本港的烈度為修定麥加利制第4度(台長你講乜呀)，即地震時，懸掛的物件會擺動。震央位於擔杆島附近海域，即香港之東南偏南約36公里，唔怪得甘應 la。

東方日報話上水一名雙程證男子在地震期間墮樓身亡，我諗同地震無關，係吹水之說。而報導話屯門村屋被震至牆壁出現裂痕，發現在一樓至二樓之間的牆壁，竟然出現一道大約一呎長的裂痕。好彩自己間屋無事。